نماز جنازہ کا طریقہ

(1) حضرت عوف بن مالک اشجعیؓ سے روایت ہے:
وہ کہتے ہیں: میں نے نبی کریم ﷺ کو ایک جنازہ کی نماز پڑھاتے ہوئے یہ دعا فرماتے سنا:

 اَللّٰهُمَّ اغْفِرْ لَهُ وَارْحَمْهُ، وَاعْفُ عَنْهُ، وَعَافِهِ، وَأَكْرِمْ نُزُلَهُ، وَوَسِّعْ مُدْخَلَهُ، وَاغْسِلْهُ بِمَاءٍ وَثَلْجٍ وَبَرَدٍ، وَنَقِّهِ مِنَ الْخَطَايَا كَمَا يُنَقَّى الثَّوْبُ الْأَبْيَضُ مِنَ الدَّنَسِ، وَأَبْدِلْهُ دَارًا خَيْرًا مِنْ دَارِهِ، وَأَهْلًا خَيْرًا مِنْ أَهْلِهِ، وَزَوْجًا خَيْرًا مِنْ زَوْجِهِ، وَقِهِ فِتْنَةَ الْقَبْرِ وَعَذَابَ النَّارِ۔ترجمہ:اے اللہ! اسے بخش دے، اس پر رحم فرما، اس سے درگزر فرما، اسے عافیت عطا فرما، اس کی مہمانی کو عزت والا بنا، اس کی قبر کو کشادہ فرما، اسے پانی، برف اور اولوں سے دھو دے، اور اسے گناہوں سے اس طرح پاک کر دے جیسے سفید کپڑا میل سے صاف کیا جاتا ہے۔ اسے اس کے گھر سے بہتر گھر عطا فرما، اس کے اہل سے بہتر اہل عطا فرما، اس کی بیوی سے بہتر بیوی عطا فرما، اور اسے قبر کے فتنے اور جہنم کے عذاب سے بچا۔

حضرت عوفؓ کہتے ہیں:میں نے اس دعا کو سن کر تمنا کی کہ کاش وہ میت میں ہوتا تاکہ رسول اللہ ﷺ کی یہ دعا مجھے نصیب ہوتی۔

(2) حضرت ابو ہریرہؓ سے روایت ہے:
رسول اللہ ﷺ جب کسی جنازے کی نماز پڑھتے تو یہ دعا فرماتے:اَللّٰهُمَّ اغْفِرْ لِحَيِّنَا وَمَيِّتِنَا، وَشَاهِدِنَا وَغَائِبِنَا، وَصَغِيرِنَا وَكَبِيرِنَا، وَذَكَرِنَا وَأُنْثَانَا، اَللّٰهُمَّ مَنْ أَحْيَيْتَهُ مِنَّا فَأَحْيِهِ عَلَى الإِسْلَامِ، وَمَنْ تَوَفَّيْتَهُ مِنَّا فَتَوَفَّهُ عَلَى الإِيمَانِ۔ترجمہ:اے اللہ! ہمارے زندہ اور مردہ سب کو بخش دے، ہمارے موجود اور غائب سب کو، ہمارے چھوٹے اور بڑے سب کو، اور ہمارے مردوں اور عورتوں سب کو۔
اے اللہ! ہم میں سے جس کو تو زندہ رکھے اسے اسلام پر زندہ رکھ، اور جس کو تو وفات دے اسے ایمان پر وفات دے۔

(3) حضرت جعفر بن محمد اپنے والد سے روایت کرتے ہیں کہ:رسول اللہ ﷺ جب جنازہ کی نماز پڑھنے کے لیے کھڑے ہوتے تو یہ دعا فرماتے:اَللّٰهُمَّ عَبْدُكَ وَابْنُ أَمَتِكَ احْتَاجَ إِلَى رَحْمَتِكَ، وَأَنْتَ غَنِيٌّ عَنْ عَذَابِهِ، إِنْ كَانَ مُحْسِنًا فَزِدْ فِي إِحْسَانِهِ، وَإِنْ كَانَ مُسِيئًا فَتَجَاوَزْ عَنْهُ۔

ترجمہ:
اے اللہ! یہ تیرا بندہ اور تیری بندی کا بیٹا ہے، یہ تیری رحمت کا محتاج ہے اور تو اس کے عذاب سے بے نیاز ہے۔ اگر یہ نیک تھا تو اس کی نیکیوں میں اضافہ فرما، اور اگر اس سے خطا ہوئی ہے تو اس سے درگزر فرما۔