أصول فقہ کا ایک قاعدہ یہ ہے کہ "الأصل في الأشياء الإباحة” اشیاء اپنی اصل کے اعتبار سے حلال اور مباح ہوتی ہیں، یہاں تک کہ ان کی حرمت پر کوئی دلیل آجائے۔ ابن تیمیہ نے فرمایا: لست أعلم خلاف أحد من العلماء السالفين في أن ما لم يجئ دليل بتحريمه، فهو مطلق، غير محجور. وقد نص على ذلك كثير ممن تكلم في أصول الفقه وفروعه، وأحسب بعضهم ذكر في ذلك الإجماع يقينا، أو ظنا كاليقين. اهـ. يعني "مجھے سلف علماء میں سے کسی ایک کا بھی اس بات میں اختلاف معلوم نہیں کہ جس چیز کی حرمت پر کوئی دلیل نہ آئی ہو، وہ مطلقاً جائز اور غیر ممنوع ہوتی ہے۔” اور اس بات کو اصولِ فقہ اور فروعِ فقہ پر گفتگو کرنے والے بہت سے علماء نے صراحت کے ساتھ بیان کیا ہے۔ بلکہ میرا خیال ہے کہ ان میں سے بعض نے اس پر اجماع کا ذکر بھی کیا ہے — یقینی طور پر یا یقینی کے قریب گمان کے ساتھ۔ اھ۔ (اسلام ویب)یہ شریعت کے اہم قواعد میں سے ایک قاعدہ ہے، اور یہ اسلام کی خوبی، آسانی، اور تنگی و پابندیوں کو ختم کرنے کی روشن علامتوں میں سے ہے۔ یہ اصول اسلام کی چند بڑی خصوصیات کو ظاہر کرتا ہے: شریعت آسان ہے، مشکل نہیں اسلام فطرت کے مطابق دین ہے
دین بلا وجہ پابندیاں نہیں لگاتا انسان کو وسعت اور سہولت دیتا ہے اسی لئے قرآن میں بار بار آیا ہے کہ: "یُرِیدُ ٱللَّهُ بِكُمُ ٱلۡیُسۡرَ وَلَا یُرِیدُ بِكُمُ ٱلۡعُسۡرَ” اللہ تم پر آسانی چاہتا ہے، سختی نہیں۔
جب کوئی مسلمان اس قاعدے کو سمجھ لیتا ہے تو وہ ہر نئی چیز ، اور استعمال کے بارے میں الگ الگ سوال کرنے کی مشقت سے بچ جاتا ہے — خاص طور پر وہ چیزیں جن کے بارے میں معلوم ہو کہ وہ اپنی ذات میں حرام نہیں، بلکہ ان کی حرمت ان کے استعمال کے بعض طریقوں میں پیدا ہوتی ہے، جیسے عام تکنیکی امور، اور انہی میں مصنوعی ذہانت (AI) بھی شامل ہے۔