ڈیجیٹل دور میں بچوں کی اسلامی تربیت: والدین کے لیے مکمل رہنمائی اور عملی طریقے

تربیت بہت عظیم اور بہترین کام ہے۔ یہ صرف پڑھانے کا نام نہیں بلکہ اچھی بات سکھانے، نصیحت کرنے، صحیح راستہ دکھانے اور خود اچھا نمونہ بننے کا نام ہے۔ تربیت سے انسان کا اخلاق سنورتا ہے اور معاشرہ بہتر بنتا ہے۔
یہ کام اس قدر اہم ہے کہ یہ انبیائے کرامؑ کا مشن رہا ہے۔ اللہ تعالیٰ نے فرمایا”هُوَالَّذِي بَعَثَ فِي الْأُمِّيِّينَ رَسُولاً مِنْهُمْ يَتْلُو عَلَيْهِمْ آيَاتِهِ وَيُزَكِّيهِمْ وَيُعَلِّمُهُمُ الْكِتَابَ وَالْحِكْمَةَ ﴾” {الجمعة: 2}. ترجمہ: …رسول لوگوں کو اللہ کی آیات سناتے، ان کا دل و کردار پاک کرتے اور انہیں کتاب و حکمت سکھاتے تھے (سورۃ الجمعہ: 2)۔اس لیے جو شخص تعلیم و تربیت کا کام کرتا ہے، وہ ایک بہت بڑے اور مبارک کام میں لگا ہوا ہوتا ہے۔

• اولاد اللہ تعالیٰ کی طرف سے بہت بڑی نعمت اور زینت ہے۔ قرآن میں اللہ فرماتا ہے:﴿ الْمَالُ وَالْبَنُونَ زِينَةُ الْحَيَاةِ الدُّنْيَا ﴾ (الکہف: 46) یعنی مال اور اولاد دنیا کی زینت ہیں۔ لیکن یہ زینت اسی وقت فائدہ دیتی ہے جب ہم اپنی اولاد کی اچھی تربیت کریں۔ اگر ہم انہیں دین، نماز، اخلاق اور اچھے آداب سکھائیں گے تو وہ ہمارے لیے باعثِ فخر اور آخرت میں نجات کا ذریعہ بنیں گے۔
  محمد ﷺ نے فرمایا کہ ہر شخص ذمہ دار ہے اور اس سے اس کی ذمہ داری کے بارے میں سوال ہوگا۔ اس کا مطلب یہ ہے کہ والدین اپنی اولاد کے بارے میں اللہ کے سامنے جواب دہ ہوں گے۔

تربیت اولاد کے سلسلے میں امام غزالی کا قول: قال الإمام الغزالي – رحمه الله تعالى -: (الصبيُّ أمانةٌ عند والديه، وقلبه الطاهر جوهرةٌ نفيسةٌ خاليةٌ عن كل نقشٍ وصورة، وهو قابلٌ لكل نقش، ومائلٌ إلى كل ما يُمالُ إليه، فإن عُوِّد الخيرَ نشأ عليه، وسَعِدَ في الدنيا والآخرة أبواه، وإن عُوِّد الشر وأًهْمِلَ إهمال البهائم، شَقِيَ وهَلَكَ،وكان الوزر في رقبة القيِّم عليه. وكما أن البدن في الابتداء لا يخلق كاملاً، وإنما يكمل ويقوى بالغذاء، فكذلك النفس تخلق ناقصة قابلة للكمال، وإنما تكمل بالتربية، وتهذيب الأخلاق، والتغذية بالعلم:

• وضاحت: بچہ اپنے والدین کے پاس ایک قیمتی امانت ہوتا ہے۔ اس کا پاکیزہ اور معصوم دل ایک ایسے بیش قیمت جوہر کی مانند ہے جو ہر نقش و اثر سے خالی ہوتا ہے۔ اس میں ہر نقش قبول کرنے کی صلاحیت ہوتی ہے اور جس سمت اسے موڑ دیا جائے وہ اسی طرف مائل ہو جاتا ہے۔
  اگر اسے نیکی، بھلائی اور اچھے اخلاق کی عادت ڈالی جائے تو وہ انہی خوبیوں پر پروان چڑھتا ہے، اور اس کی وجہ سے وہ خود بھی دنیا و آخرت میں کامیاب ہوتا ہے اور اس کے والدین اور اساتذہ بھی اس سعادت میں شریک ہوتے ہیں۔ لیکن اگر اسے برائی اور بد اخلاقی کی طرف چھوڑ دیا جائے اور جانوروں کی طرح نظر انداز کر دیا جائے تو وہ بدبختی اور ہلاکت کا شکار ہو جاتا ہے، اور اس کی ذمہ داری اس شخص کے سر ہوتی ہے جو اس کی تربیت کا ذمہ دار تھا۔
  جس طرح انسانی جسم ابتداء میں مکمل اور مضبوط پیدا نہیں ہوتا بلکہ غذا اور پرورش کے ذریعے بتدریج نشوونما پاتا ہے، اسی طرح انسان کی روح اور نفس بھی ابتدا میں ناقص ہوتے ہیں مگر ان میں کمال حاصل کرنے کی صلاحیت موجود ہوتی ہے۔ یہ کمال صحیح تربیت، اخلاق کی اصلاح اور علم کی غذا کے ذریعے حاصل ہوتا ہے۔